للمرة الأولى.. زيزو يكشف عن أزمة تجديد عقده مع الزمالك ويفجر مجموعة من المفاجآت

كشف هاني حتحوت عن تطورات جديدة بشأن مصير أحمد مصطفى زيزو، لاعب الزمالك ومنتخب مصر، في ظل حالة الجدل المثارة خلال الأيام الأخيرة حول اقتراب اللاعب من الانضمام لصفوف النادي الأهلي خلال فترة الانتقالات الصيفية المقبلة، خاصة مع انتهاء تعاقده داخل جدران القلعة البيضاء بنهاية الموسم الجاري.

هاني حتحوت: زيزو أبلغني أنه في غاية الإحباط

وقال «حتحوت» عبر برنامج «الكلام المظبوط»، المُذاع عبر «أون سبورت إف أم»: «النهاردة فجرا بعت لزيزو قلت له لو حابب تتكلم، لقيته اتصل بي واتكلمنا لأكثر من 50 دقيقة، وشرح لي الموقف كاملاً».

وأضاف: «زيزو قالي إنه في غاية الإحباط، ومش مصدق إن دي المعاملة اللي يستحقها من مسؤولي وجماهير الزمالك، وأكد أن والده رجل محترم، وهو اللي جدد عقده مع الزمالك مرتين ومخدش فلوس، والمشكلة الحقيقية هي السمسرة اللي بتحصل في أي صفقات تانية، ومكنش فيه حاجة بتحصل غير لما بتتسرب بعد الجلسة مباشرة».

وأردف الإعلامي: «زيزو قالي مشكلتي ليست الفلوس، لأن ببساطة اتغير عليا 7 مجالس إدارات وكنت بجدد عقدي عادي، وحتى لما طلع هشام نصر قال إني عاوز 60 مليون جنيه، والله ما حدث، لكن بابا قاله هتعرف تعوض ابني بعد عرض نيوم بما إنكم رفضتو العرض، لكن مكنش فيه رد مقنع».

زيزو: ميدو كان يهاجمني في المدرجات

وأوضح هاني حتحوت: «زيزو قالي أيضا: العمال في النادي كانوا بيقولوا إن الزمالك خد قرض بـ200 مليون جنيه عشان يجدد للزمالك، وميدو اللي عاوز يجدد لي كان بيهاجمني في المدرجات خلال مباراة مودرن سبورت، وقال بقى ده اللي عاوز كل الملايين دي؟».

وأضاف: «زيزو قالي بقالي 7 شهور بتحايل عليهم عشان أجدد، وكنت بغشش حسين لبيب إزاي يتعامل مع والدي، وقلت لشيكابالا أرجوك اتصرف مع الإدارة وخليهم يتعاملوا ويجددوا لي»، متابعًا: «اللاعب أقسم قائلا: «والله العظيم، عرض الزمالك أقل عرض متقدم لي سواء خارج مصر أو بداخل مصر».

ماذا قدم زيزو مع الزمالك الموسم الجاري؟

لعب «زيزو» هذا الموسم 29 مباراة مع الزمالك: 15 لقاء في الدوري المصري، و8 في كأس الكونفدرالية الأفريقية، و2 في كأس السوبر المحلي، و3 في كأس مصر، ومباراة في السوبر الأفريقي.

وسجل «زيزو» 7 أهداف، من بينها 3 في الدوري المحلي، و3 ببطولة الكونفدرالية، وهدف وحيد في كأس مصر، وصنع 8 لزملائه.